نور يا فانوس نور

نور يا فانوس

نور يا فانوس يا فانوس نور
ورينا اللى عليه بندوّر
يمكن يا فانوس
على زِر ندوس
يخرج منك مارد محيوس
بيقول : بس خلاص هانصوّر !



نور يا فانوس ، النور مقطوع
والقمر اللى على الباب ملطوع
بيناجى الليل
ويقول مواويل
الموجى وفايزة ومرسى جميل
خلّوه اتنرفز واتهوّر !



نور يا فانوس بيّن للناس
على نورك كرامات ( اليوسى ماس )
لو كل وزير
باسم التطوير
هايطبّق هنا أفكار الغير
عمر التعليم ما هيتطوّر !



نور يا فانوس ع الكادر اياه
واعلنها شهادة لوجه الله
لو كان إنجاز
إن الأستاذ
يمتحنوه تلاميذه الأفذاذ
تبقى شهادة بختم مزوّر !



نور يا فانوس حدد بالذات
مين سرّب أو باع الامتحانات
أصل المسئول
شفناه بيقول
إنه لا مستغرب ولا مذهول
فى حوار واضح مش متحوّر ؟!



نور يا فانوس ورّى الجمهور
صفر ( العشرين عشرة ) المشهور
واسألهم مين
أهدر ملايين
ورجع ببرونزية بيكين
لا اتحاسب ولا حتى اتعوّر !



نور يا فانوس بيّن بوضوح
حال الشعب المصرى المدبوح
اللى مالوش غير
الصبر نصير
ركّز ع الواقفين فى الطوابير
واوعى تبالغ والا تزوّر !



نور يا فانوس قول للمسئول
لا سياحة ولا قناة ولا بترول
لو يصْحَى ضمير
كام ملياردير
مصرى ، لا يمكن هنلاقى فقير
مطحون من جوعه بيتضوّر !



نور يا فانوس اكشف ألاعيب
اللى ف خيرنا نازلين تهليب
دا قطاعنا العام
انباع يا حرام
لا عرفنا لمين ولا حتى بكام
لكن مين ورا مين هايدوّر ؟



نور يا فانوس من غير ولا زيت
ولا جاز ولا شمعة ولا كبريت
دا زمان الجات
ورّانا حاجات
من صًنع الصين فيها ابتكارات
فوق كل ما كنا بنتصور !



نور يا فانوس يا فانوس رمضان
فكّرنا بأمجاد ناسنا زمان
رجّعنا نعيش
على لقمة عيش
حاف ، بس بعزّة ومانخليش
بيتنا بفوانيس غيرنا منوّر !



من اشعار الموجي