منطقة ثالثة مهددة تحت المقطمتاني الدويقه يا ناس .. دا الرحمه مطلوبه
تحت المقطم فيه ناس .. عايشه ومرعوبه
خايفين يكون عمرهم .. أيامه معدوده
القلب فيهم يقف ، من صوت وقوع طوبه
ـــــــــــــــ
واحد عجوز مِنتِهي .. أو واحده كركوبه
خايفين على عمرهم .. دي الدنيا مرغوبه
ليكون حياه وانتهت .. ما عادتش ممدوده
ويموتوا تحت الهَدَدْ .. قبل اكتمال توبه
ــــــــــــــــ
الكل رافِض يسيب بيته عشان طوبه
رغم ان طرف الجبل .. أحجاره معيوبه
ممكن ثواني وتِبقى .. داره مهدوده
لاكِن يروح على فين .. والسُكنىَ محدوده
ـــــــــــــــــ
يـِشكِي يلاقي الودان .. بالطرشه مضروبه
وان حد مسؤل قرا .. شكوى ومكتوبه
حتكون دماغ حضرته .. قافله ومسدوده
ويقول ف نفسه أنا .. مالي ومال طوبه
ــــــــــــــــــ
ويرد إن ( الأمان .. حِسبه ومحسوبه
والهضبه دي من زمن .. واقفه على الطوبه
وناس كتير تحتها .. عايشه وموجوده
لا يوم قرينا خبر .. ولا شكوى مكتوبه )
ــــــــــــــــــ
ويعَدِّي يوم ويومين .. نصحَىَ على الخِيبه
صوت فرقعه مُزعِجه .. وعفار ف زعبوبه
كان انهيار في الجبل .. على ناس ومخضوضه
فيهم كتير اندفن .. في حِته منكوبه
ــــــــــــــــــــ
طلعت لجان وابتدت .. تِبحث عن الطوبه
وعن سبب ما جرى .. للأرض والتربه
دَرَسوا المسائل قوي .. باعصاب ومشدوده
طِلعوا بإن البيوت .. تراخيصها مضروبه
ــــــــــــــــــــ
طب كونتو فين من زمان .. ساكتين على الخيبه
ورضيتوا ع اللي حصل .. واللا دى سبوبه
خليتوا ليه البُنا .. واقعه وموجوده
وعنيكو شايفه انما .. ع الجُرْم معصوبه
ـــــــــــــــــــــ
والباشمهندس سقط .. ومعدش له هيبه
علشان تمن عملته .. إتحط في جيوبه
ومراته تِلبس بقى .. من كل شيئ موضه
راح يجرى إيه لِبَلد .. بالسرقه منهوبه
ــــــــــــــــــــ
مرت حكاية الدويقه .. والناس ف غيبوبه
وكأن كارثة قدَر .. حصلت ومكتوبه
يا ناس يا أهل التـُقىَ .. دي نفوس ومكدوده
هوَ حياة البشر .. في اديكو ألعُوبه ؟
ــــــــــــــــــ